![](https://blogger.googleusercontent.com/img/b/R29vZ2xl/AVvXsEjnLde-z61jgXlgl5y0I6hJbr2Sl9stgdvbfuFLR_R2v3uwFatYPSd16TPUeq0mR2sPXHXzpgCw6-BGc8pUQBxUkXe1OLbShbf4HwzgdbhzvaegBd2Fc_jyPusgmtSPOd8VxFXZ/s320/praza+magdalena,+stago.+barreiros.jpg)
A MIRADA RETIDA (Marcos Valcárcel, La Región 5-10-08)
O espírito da paz.
O espírito da paz.
Hai uns anos derrubouse aquí unha vella casa, caída ó chan como caen os soños cando esperta o día cheo de incertezas. Seica este lugar foi de antigo a claustra da igrexa de Santa María Madre; logo foi cemiterio medieval e aínda mercado dende mediados do século XIX.
É a praza da Magdalena, para Xesús Ferro Couselo, que traballou ó seu carón, o curruncho máis romántico da cidade: é doado coincidir co egrexio arquiveiro. Tamén Vicente Risco se emocionou coa paz e a beleza do seu fermoso cruceiro, que procede da Alameda do Cruceiro. Segundo conta Afonso V. Monxardín no século XVII querían poñerlle portas en Santa María Madre porque, di unha carta ó Correxedor de 1624, “a las noches se cometen allí feos y graves pecados usando mal del lugar tan pío”. Hoxe é un dos centros simbólicos da nosa cidade histórica, aínda que moitos ourensáns o ignoren. Nin sequera os poetas lle prestaron os seus versos: é ben sorprendente. Pero tamén reclamo que nunca perda o espírito da paz que impregna a súa fisionomía, a lenta vaguidade das súas sombras e o fecundo silencio das súas pedras enchoupadas de eternidade. (Foto de Santiago Barreiros).