![](https://blogger.googleusercontent.com/img/b/R29vZ2xl/AVvXsEiCP1uc0YC-hSqoKnUZXf_jO8IEwgLuoOIrBJ8kEUGyXrFaMokFjaFyFajIHX-dy8E0BJEpU3o6wC1pUJeOLuD6hKj6tCkhW5I2lhk_6A1BU4uX1EcHCIoImm3XhnQPLSaWTvOIOw/s400/lotto14+retrato+dun+home+con+libro,+1526.jpg)
Pan por Pan martes 4 decembro. Imaxe: Retrato dun home con libro, de Lorenzo Lotto, 1526.
É mellor que os profesores non lean os xornais algúns días. Para non deprimirse. Vexan varios titulares recentes: “España retrocede en lectura”, “España, suspenso en ciencias”, etc. O peor de todos é un informe do Ministerio de Cultura onde consta que o 22 por cento dos universitarios admite que non le ningún libro. Algo vai mal: ou a cultura ou a Universidade ou todo xunto. E non todo está en Internet e son medios complementarios, por suposto. Mal vai a cultura do libro por este camiño se as súas elites, as que chegan á Universidade, refugan dos libros como do demo. Son os rapaciños de 10 a 13 anos os que máis páxinas devoran, din os editores. Ou sexa que o futuro son bestsellers para todos e libros infantís para os cativos. E o resto? Outra nova: “Isi & Disi” e “El calzonazos” as películas españolas máis vistas na tele. Terá algo que ver co anterior?